(تصوير عبداللطيف قعدان)
بمبادرة من جريدة النهار وبالتعاون مع مشرف قسم التجمعات والفعاليات والدفع الرباعي بأكبر موقع للسيارات والدراجات النارية المعدلة في الكويت kwtmotor م. م. علي باقر فتحت النهار جلسة حوار حملت عنوان هموم ومشاكل هواة المحركات في الكويت . ومن خلال مبارزات النقاش انهالت اصوات المعاناة وانطلقت آفاق التعبير عن الراي تعانق عنان البحث عن الحلول ، وبعد عرض الموضوع على صفحات الموقع رصدت «النهار» أبرز المشاركات من الاعضاء التي بينت حجم المشاكل التي يعاني منها عشاق ومحبي السيارات في الكويت التي اخترنا منها الآتي لاستعراضه على صفحات السيارات:
.Zodiac : الكويتي تطلع عينه بالتفتيش.. والمصري «يدقوله » تعظيم سلام..!
Mr.Zodiac عبر عن معاناته فاستهل حديثه عن تعديل السيارات.. فقال: إذا الملصقات أو الاستكارات مخالفة...!،.. ما عندنا مانع مخالفة.
- بس احنا نبي شي واحد... ..نبي إذا في شخص حاب يعدل سيارته يكون في «جهة رسمية» مثل نادي السيارات (..إلي مو قادر يحرك ساكن وتكون هذه الجهة تحت إدارة لجنه من المرور تقوم هذه الجهة بترخيص السيارات المعدلة أو إعطاء الأرشادات للأشخاص الراغبين في تعديل سياراتهم
مثلا في الإمارات تعديل السيارة مسموح من جميع النواحي ويتم ذكر التعديلات في دفتر السيارة.. خل يكون عندنا شي جذي حتى لو يتم أخذ رسوم مضاعفة ولا الجبر على الواسطة
و بعدين في شغله ثانية ليش ما يسمحولنا بأكثر من لونين..؟! لصبغت - السيارة شنوالسبب..! وليش يمنعون الرسم على السيارة..! يعني في سيارات تكون عليها رسمات نار مثلا هذه ممنوعة شنوالسبب ترى الكويت بلد ديموقراطي...، وفيه حريات والسيارة تعبر عن الحريه
هذه السالفه صادفتني قبل فترة في أحد نقاط التفتيش
- وأنا مار شي طبيعي يصفطونك لانك ولد شباب...! وموترك مضبط وتعال شوف التحقيق إلي يسوونه معاك
- ليش مغير شكل الدعاميه..! ليش مركب رنقات..! ليش منزل السيارة..! ليش..؟، وليش..؟ وليش..؟ لي الصبح مانخلص وإلي يقهرك مو بس يخالفونك..؟ لا يجيكون على بطاقتك مطلوب ولا لاء
- مافي مشكلة خايفين على الأمن أنزين الأمن طبقه على الكل مايصفطون إلي الكويتي بالتفتيش ويجيكون عليه مطلوب ولا لاء والمصري والهندي «يدقوله» تعظيم سلام..!
وييلك بسيارة قرمبع مكسرة مافيها ليتات ومكربنه ولا فيها صرفيه ويمشونه وإحنا سياييرنا زقرت طايحين فينا بها المخالفات اللي عنده فيتامين )و( يمشي.. واللي ما عنده.. يطحس..!
أما العضو الشاب «كامارو» فقبيل الاسترسال في المشاكل والاحزان وجه اشاد بجهود جريدة النهار في الاستماع للشباب ونقل معاناتهم وعن مشاكله عبر بالاقوال: - الكويت بعد ماكانت عروس الخليج بكل شي ردت لي وره 100 سنة طبعاً دول الخليج كلهم تقريباً نفس القوانين (طبعاً على المخالفات وهالسوالف) بس الكويت الله يحفظها غير عنهم.. ياجماعة والله لما اسافر السعودية او الامارات او البحرين تشوف مناك الشرطة متساهلة وياهم بكل شي ومسموح لهم يسون اللي يبونه مو عندنا اللي عنده فيتامين (و) يمشي واللي ما عنده يطحس.
ليش بالامارات مسموح حق الشباب يسوون بسياييرهم اي شي...! حتى تغير اللون..!، وحتى لو تبي تحط 100 لون بالسيارة..! محد يكلمك ومثل الشي السعودية وهم البحرين.
اذا البحرين اصغر الدول في العالم والخليج مسويه احسن مضمار للربع ميل في الخليج كله..؟؟! لأنهم يهتمون بمطالب الشباب لكن احنه الشباب اساس المشاكل .!الشباب يقحصون ، ويزعجون الناس بسياييرهم! الشباب يدوسون بالشارع!.
الشباب ليش يضبطون سياييرهم لا شكل الوكاله احلى هذا تفكيرهم (اي حطولهم نادي حق كل هالمتطلبات وافتكو منه ).
واذا ياك شرطي وراك او يكون جدامك شاف سيارة سبورت لازم يوقفه اي ليش لأنها سبورت اكيد عليها بلاوي..! اكيد هذا مخالف..! اكيد هذا ملغوم! وحتى لو يعني خلاص ما لقى شي يقولك انت مو رابط الحزام..!
والله خلو الشباب يستانسون ترى الانسان ما يعيش الا مرة وحدة يعني شنو ظاركم اذا واحد غيم سيارته او واحد حط لزقات او حاط صوت (لو بقول ازعاج انا اقوله شباب الكويت يعرفون الاصول ) او رنقات او زوايد يعني الا تبون تخالفون على اتفه الاسباب..
وانا واحد من الشباب اللي داخليت سيارته جلد والله بس ابطل باب السيارة بعد ما اخلص الدوام الكشن مو يحرق الا يذبح ليش لأنه ممنوع التغيم ولا اذا شافك حاط باقات وصافط اي مكان خالف وكتب بالمخالفه تظليل سياره من جميع الجهات يعني يا نموت حر او نتخالف ليش؟
(اذا دينا قال يسر ولا تعسر ) واحنه بصراحة معسرين علينا بكل شي لكن فيه ناس بالداخلية والله ينحطون على الراس حتى لو يخالفك بس والله ينحط على الراس لكن فيه ناس خلني ساكت احسن..
وفيه نقطة بصراحة محيرتني اذا شاف واحد حاط ايميله او موقع بالنت خالفة والمشكلة الدورية من وره حاطين موقع وزارة الداخلية.
الاستكرات فلم مكسيكي..! مع الداخلية
أما العضو المقهور المنعوت بسلفيرادو فعبر بأنين المعاناة من تجاوزات الداخلية فقال:
.. ياخي شقول بس! شقول والله تعبت من هالداخلية..!
والله العظيم ما خلو شي ما خالفوني عليه لو بجمع مخالفاتي يطلع مبلغ يخرع بيقولون ما تمشي على القانون؟؟
- مو صار القانون كل شي نسويه بنظر الداخلية ممنوع تمشي 40 ممنوعاً او تمشي 80 ممنوعاً كل شي ممنوع!!
- والإستكرات فلم مكسيكي..! مع الداخلية كلما حطيت كلمه عاديه بسيطه لا ممنوع وشي اذكر ربي فيه لا ممنوع
- حطيت الدعامية تغير شكل المركبه ممنوع..! وحطيت الباقات والدواسات والتغييم كل شي ممنوع!
لدرجة الموتر رديته شكل وكالة من كثر ما تعبت منهم يعني التغيم بالصيف حطيته وخفيف 25 بالميه لا ممنوع ما يصير..
- شوف هالسالفه.. شلت دبات التلوث عشان اريح المكينه وتاخذ راحتها ياني واحد من هالدوريات يقولي صوت دبه
- أقول اي صوت هذا مافي صوت وكالة هذا يقولي لا صوت دبه وسحب الدفتر ورديته والله يستر ما ينسحب مره ثانية
- وعن نفسي ياما سويت بالسيارة ولو المجال مفتوح لخرجت الا ابداعات من الشباب المهتم بالمجال هذا.
- اللي صج يحز بالخاطر سووووووووء استعمال السلطة بالنسبة للشرطة
MADBOY:..لاعت جبذي.. يا شباب والله حرمت أغيم..!
عن مشاكل التغييم واصل العضو «ماد بوي» الشكوي فقال:
حرمت اغيم..لاعت جبدي..!
والله الصراحه يا شباب التغييم اسوي كل يلي يبونه واغيم 30 في المئة وهم يقولي لا انت مغيم فوق 50 في المئة..!
اقوله يا ولد الحلال مغيم اقل يقولي: .. ماكو لازم تتخالف لانه درايش السيارة اصلا فيها نسبة انزين
اتخالفت مرتين والمشكلة ناس تقول انت مو مخالف؟ وناس لا..! يعني الحين منو اصدق..!
وطايحيلك بشغله يقولون انك شباب والعايلات اهمه بس يقدرون يغيمون شنو انا مولود بالشارع..!هم انا ولد عايله.
- حرام عليهم والله حرام عليهم خل يخففون علينا اشويه. والمشكله اذا اعترضت ولا شي يهددك انه يسحبك المخفر ليش ماسويت شي.
أنتهـــــــــــــــــى
رابط اللقاء بالجريدة / أضغط هنــــا 
